Dyma’ch diweddariad dydd Gwener, sy’n cynnwys:

·       Dathlu llwyddiant Safon Uwch ledled Caerdydd

·       Cynllun Cyfnewid Ieuenctid Caerdydd yn dathlu cynllun cyfnewid ieuenctid hiraf Ewrop gyda Stuttgart

·       Dathlu Ysgol Pencae yn arolygiad diweddaraf Estyn am ei gofal, ei chwricwlwm a’i hysbryd cymunedol rhagorol

Unwaith eto, mae perfformiad Caerdydd yn nodedig, gyda chanlyniadau'n uwch na chyfartaledd Cymru.

Yn ôl canlyniadau TAG dros dro CBAC, mae 36.3% o raddau Safon Uwch Caerdydd yn A* i A, o'i gymharu â 29.5% ledled Cymru. Cyflawnodd 98.6% o geisiadau raddau A* i E, a sicrhaodd 82.8% raddau A* i C, o'i gymharu â 77.2% yn genedlaethol.

Mae cymwysterau galwedigaethol, gan gynnwys dyfarniadau CBAC a Gwneud i Gymru, wedi'u hasesu gan ddefnyddio safonau cyn y pandemig. Mae'r canlyniadau'n uwch na'r rhai yn 2019 cyn y pandemig a chyn i system gymwysterau Cymru wneud addasiadau, i ystyried yr aflonyddwch yr oedd dysgwyr wedi’i brofi. Maent ychydig iawn yn is na chanlyniadau 2024 - a nododd y cam olaf wrth drosglwyddo yn ôl i drefniadau cyn y pandemig yn system gymwysterau Cymru. Mae hyn yn adlewyrchu tuedd gyson ledled Cymru.

Eleni, mae myfyrwyr Caerdydd ymhlith y cyntaf yng Nghymru i dderbyn Lefel 3 Bagloriaeth Sgiliau Cymru Uwch. Cafodd y cymhwyster hwn ei gyflwyno yn 2023 i ddisodli'r Dystysgrif Her Sgiliau Uwch ac mae'n cyfateb i Safon Uwch. Mae'n pwysleisio sgiliau ymarferol ac mae'n cael ei gydnabod yn eang gan brifysgolion a chyflogwyr.

Darllenwch fwy yma

Mae Gwasanaethau Ieuenctid Caerdydd yn falch o gyhoeddi bod y cynllun cyfnewid ieuenctid hirsefydlog gyda Chanolfan Ieuenctid Stammheim yn Stuttgart, yr Almaen, yn dychwelyd.

Rhwng 1 a 9 Awst, croesawodd Canolfan Ieuenctid Gogledd Trelái bobl ifanc o Stuttgart yn yr hyn sy'n nodi'r bennod ddiweddaraf mewn partneriaeth sydd wedi rhychwantu dros bum degawd, y gyfnewidfa ieuenctid hiraf yn Ewrop.

Roedd y digwyddiad yn cynnwys arddangosfa ffotograffau a phodlediad o deithiau cyfnewid yn y gorffennol, gweithgareddau gardd gymunedol, teithiau cyfnewid ieithyddol, pobi cacennau Cymreig, a pherfformiadau cerddorol gan gyfranogwyr.

Darllenwch fwy yma

Mae Ysgol Pencae, ysgol gynradd cyfrwng Cymraeg yn Llandaf, wedi derbyn canmoliaeth ddisglair yn ei hadroddiad arolygu diweddaraf gan Estyn.

Mae'r arolygiad yn dweud bod yr ysgol yn "gymuned ofalgar a chynhwysol" lle mae disgyblion yn ffynnu mewn amgylchedd teuluol a chefnogol. Canmolodd arolygwyr arweinyddiaeth gref yr ysgol ac ymdrechion cydweithredol staff i ddarparu cwricwlwm cyfoethog a diddorol.

Mae'r adroddiad hefyd yn tynnu sylw at ymrwymiad yr ysgol i'r iaith a'r diwylliant Cymraeg, gyda mentrau fel y Criw Cŵl Cymraeg a gweithgareddau sy'n hyrwyddo amrywiaeth a dinasyddiaeth.

Darllenwch fwy yma